ನೂರು ನೋವುಗಳ ನೂಕಾಚೆ ದೂರ(ಗೀರ್ವಾಣಿ) - Nooru Novugala Nookache Doora(Geervani)

ನೋವು ಹಾಗೂ ದುಃಖದ ಜೊತೆ ವ್ಯವಹರಿಸುವ ರೀತಿ ಒಬ್ಬರಿಗಿಂತ ಒಬ್ಬರದು ವಿಭಿನ್ನ. ಅದರಲ್ಲೂ ಸಾವಿನ ದುಃಖದ ಬಗ್ಗೆ ನಾವೆಲ್ಲ ಬಹಳ ಸೂಕ್ಷ್ಮವಾಗಿ ವ್ಯವಹರಿಸುತ್ತೇವೆ. ಒಮ್ಮೆ ನಮ್ಮವರನ್ನು, ನಮ್ಮ ಪ್ರೀತಿ ಪಾತ್ರರಾದವರನ್ನು ಕಳೆದುಕೊಂಡೆವು ಎಂದರೆ ಅದೆಷ್ಟು ಕೋಟಿ ಕೊಟ್ಟರೂ ಅವರು ಮರಳಿ ಸಿಗುವುದಿಲ್ಲ. ಯಾವ ದೇಶಕ್ಕೆ ಹೋಗಿ ಹುಡುಕಿದರೂ ಕಾಣುವುದಿಲ್ಲ. ಯಾರಿಂದಲೂ ಮರಳಿ ಕರೆತರಲು ಸಾಧ್ಯವಿಲ್ಲ. ಇಂಥ ಅಸಹಾಯಕತೆಯ ಪರಮಾವಧಿಯನ್ನು ನಾವೆಲ್ಲರೂ ಒಂದಲ್ಲ ಒಂದು ದಿನ ತಲುಪಿಯೇ ತಲುಪುತ್ತೇವೆ.

ಅಂಥ ಪರಮಾವಧಿ ದುಃಖದ ಬೇರೆ ಬೇರೆ ಮುಖಗಳನ್ನು ಪರಿಚಯಿಸುತ್ತದೆ ಈ ಪುಸ್ತಕ. ದುಃಖದಿಂದ ನಾವು ಹೇಗೆಲ್ಲ ಬದಲಾಗುತ್ತೇವೆ, ನಮ್ಮ ಸಂಬಂಧಗಳು ಹೇಗೆ ಅರ್ಥವಾಗುತ್ತವೆ, ನಾವು ಏನನ್ನು ಕಳೆದುಕೊಳ್ಳುತ್ತೇವೆ, ನಮ್ಮ ಭಾವನಾತ್ಮಕ ನಷ್ಟದಲ್ಲಿ ನಮಗೇನಾಗುತ್ತದೆ, ನಮ್ಮ ದೇಹದ ಮೇಲೆ ಏನು ಪರಿಣಾಮವಾಗುತ್ತದೆ ಎಂಬುದನ್ನೆಲ್ಲ ವಿವರಿಸುತ್ತಾ ಹೋಗುತ್ತದೆ ಈ ಪುಸ್ತಕ.

ದುಃಖ ಅಥವಾ ಬೇಸರ ಒಂದು ಸಾಮಾನ್ಯ ಸಂಗತಿಯಲ್ಲ. ನಮ್ಮನ್ನು ಅನಾಮತ್ತಾಗಿ ಬದಲಾಯಿಸಿ ಬಿಡುವ ಅಸಾಮಾನ್ಯ ಭಾವನೆ ಅದು. ಇಂಥ ನೋವುಂಡು ಕುಗ್ಗಿ ಹೋದವರ ಕತೆಯೂ ಇದರಲ್ಲಿದೆ.

ಜೊತೆಗೆ ಬದುಕನ್ನು ಮತ್ತೆ ಕಟ್ಟಿಕೊಂಡವರ ಬಗ್ಗೆಯೂ ಈ ಪುಸ್ತಕದಲ್ಲಿ ಓದಬಹುದು.

ದುಃಖವನ್ನು ಅದದ್ದಿಂತೆ ಅನುಭವಿಸುವುದು, ಅದರಿಂದ ಹೊರ ಬರುವುದು ಹಾಗೂ ಘನತೆಯಿಂದ ಬಾಳುವುದು ಈ ಮೂರನ್ನೂ ವಿವರಿಸುತ್ತಾ ಹೋಗುತ್ತದೆ 'ನೂರು ನೋವುಗಳ ನೂಕಾಚೆ ದೂರ' ಪುಸ್ತಕ.